मागच्या भागात आपण व्हेरिएबलच्या वापरातील पहिला टप्पा शिकलो, व्हेरिएबल डिक्लरेशन (Variable Declaration) चा. एखादं व्हेरिएबल वापरायच्या आधी त्या प्रोग्रामला सांगायचं की आपण अमुक एका नावाचं व्हेरिएबल वापरणार आहोत. म्हणजे, त्यानुसार कंप्युटर त्याच्या मेमरी (memory) मधे एक जागा राखून ठेवतो, नि त्या जागेला आपण दिलेलं नाव देतो. जेव्हा आपण त्या नावाच्या व्हेरिएबलमधे काही माहिती साठवायला जातो, तेव्हा ती, मेमरीमधील त्या राखून ठेवेलेल्या भागात साठवली जाते.
जावास्क्रिप्ट सारख्या भाषांमधे, व्हेरिएबल डिक्लेअर करताना नुसतं "var x;" असं व्हेरिएबलचं नाव डिक्लेअर केलं तरी पुरतं. परंतु इतर काही भाषांमधे, व्हेरिएबलच्या नावाबरोबर त्याचा डेटा टाईप (data type) पण डिक्लेअर करावा लागतो. व्हेरिएबलचा डेटा टाईप म्हणजे त्या व्हेरिएबलमधे आपण काय प्रकारची माहिती ठेवणार आहोत ते. उदाहरणार्थ, आपण त्या व्हेरिएबलमधे व्यक्तिचं नाव साठवून ठेवणार आहोत, की वय साठवून ठेवणार आहोत, की जन्मतारीख साठवून ठेवणार आहोत, याप्रमाणे त्याचा टाईप बदलेलं.
वेगवगळ्या भाषांमधे या टाईप्सची वेगवेगळी नावं असतात. उदाहरणार्थ, जावा (Java) मधे पुर्णांकासाठी int, अपुर्णांकांसाठी float, मजकूरासाठी String, तारखेसाठी java.util.Date, इत्यादी. व्हिज्युअल बेसिक (Visual Basic) मधे पु्र्णांकासाठी Integer, अपुर्णांकांसाठी Double, मजकूरासाठी String, तारखेसाठी Date, इत्यादी. या भाषांमधे व्हेरिएबल डिक्लेअर करताना नुसतं जावास्क्रिप्ट भाषेतल्या सारखं var लिहून पुरत नाही. त्या भाषेतील टाईपनुसार व्हेरिएबल डिक्लेअर करावं लागतं. सोबतच्या आकृतीत याचे काही नमुने दिले आहेत.
Variable Declarations in JavaScript
Variable Declarations in Java
Variable Declarations in Visual Basic
या वेगवेगळ्या भाषांच्या वेगवेगळ्या तऱ्हांनी गोंधळून जाऊ नका. सध्या फक्त एवढं लक्षात ठेवा की:
१. बहूतेक भाषांमधे प्रोग्राममधे व्हेरिएबल वापरण्याआधी ते डिक्लेअर करावं लागतं.
२. आपण जी भाषा वापरत असू, त्या भाषेच्या पद्धतीप्रमाणे, टाईपसकट किंवा टाईपशिवाय, ते डिक्लेअर करायचं असतं.